Необична сцена во американската сојузна држава Ново Мексико привлече големо внимание на социјалните мрежи, откако црна мечка беше снимена заглавена на врвот на телефонска бандера, висока околу 10 метри.
Видеото го снимила Шенон Маленс додека патувала по автопат од Ново Мексико кон Оклахома. Во руралната област Гледстон, таа ја забележала мечката како со предните шепи се држи за бандерата, додека задните нозе ѝ висат од двете страни.
На снимката се слуша и повик до службите за итни случаи, при што било пријавено дека мечка се наоѓа на врвот на столб за улично осветлување. Одговорот од операторот бил дека веќе се пристигнати повеќе пријави и дека за случајот е известена државната служба за заштита на дивиот свет.
Како што им било објаснето на граѓаните, стручните служби не можеле да ја успијат мечката со средство за седација, бидејќи постоела опасност, по дејството на лекот, животното да падне од голема височина и да се здобие со тешки повреди.
Видеото подоцна го сподели и Министерството за внатрешни работи на САД, кое со доза хумор напиша дека „ја цени посветеноста кон американската енергетска доминација, но не на овој начин“. Објавата брзо стана вирална и собра повеќе од 230.000 прегледи.
И покрај напорите на надлежните служби, мечката не беше спасена. Од Одделот за риби и див свет на Ново Мексико соопштија дека животното доживеало струен удар пред спасувачите да успеат да интервенираат.
