Силно невреме со обилни врнежи и грмежи утрово го зафати Сплит и поширокото подрачје, предизвикувајќи поплави на повеќе локации и сериозни проблеми во сообраќајот.
Во делови од градот за само еден час наврнале повеќе од 70 литри дожд на квадратен метар, по што биле поплавени приземни станови, гаражи, лифтови и детски градинки. Водата се слевала по улиците, а поради затнатите одводи сообраќајот се одвивал отежнато.
Примени биле повеќе од 60 пријави, а сите расположливи екипи на пожарникарите и на „Водовод и канализација“ биле на терен од раните утрински часови, каде што ја испумпувале водата и ги отстранувале последиците од невремето.
Невремето предизвикало проблеми и во Клиничко-болничкиот центар во Сплит. Околу 10 часот водата навлегла во просторијата за физикална терапија на Одделот за физикална медицина и рехабилитација со ревматологија. Според информациите од теренот, вода навлегувала од подот, но истекувала и од таванот и ѕидовите.
Вработените и пациентите веднаш реагирале со крпи и кофи, а директорот на КБЦ Сплит, Крешимир Долиќ, дошол на местото за да ја провери состојбата. Истекување на вода било забележано и во други делови од болницата.
Посебно внимание предизвикува фактот што просторот за физикална терапија бил темелно реновиран и отворен во ноември 2024 година, по инвестиција од Министерството за здравство вредна 1,29 милиони евра.
За сплитскиот регион денеска е во сила портокалово предупредување поради грмежи. Метеоролозите предупредуваат на можност за нови обилни врнежи, силен ветер и град, како и на локални поројни поплави.
Од надлежните служби се апелира граѓаните да бидат внимателни, трпеливи и да ги следат официјалните известувања.
