Свадбеното видео кое деновиве е еден од најсподелуваните клипови на социјалните мрежи доби неочекуван политички епилог.
На снимката, која првично ја објави рок-бендот „Бункер“, се гледа група млади луѓе како во еуфорична атмосфера пеат песна од Митар Мириќ. Илјадници корисници коментираа дека ваква сцена „ни Кустурица не би можел да режира“.
По огромниот интерес, се огласи таткото на младоженецот, Горан Мулина, кој откри дека видеото е снимено при доаѓањето по невестата во селото Костојевиќи. Тој нагласи дека меѓу присутните имало музичари, актери, режисери, тонци и други млади уметници, а целата атмосфера била целосно спонтана.
Воедно, тој остро реагираше откако, според неговите тврдења, снимката била споделувана од провладини медиуми. Порача дека на свадбата немало ниту еден поддржувач на СНС.
„Младите од видеото не припаѓаат на вашиот талог и од таквата младина треба да се учи. Младината ве победува. Студентите победуваат“, напиша таткото на младоженецот.
