(Видео) „Од бесплатен оброк за сите ученици до субвенција од 1.000 денари – уште едно неисполнето ветување на Герасимовски и СДС“, вели Ристовска Додевски

Советничката во Општина Центар и претседателка на Унијата на жени на ВМРО-ДПМНЕ Центар, Диана Ристовска Додевски, го обвини градоначалникот Горан Герасимовски и СДС дека не го исполниле ветувањето за бесплатен оброк за сите ученици, туку наместо тоа предвиделе субвенција од 1.000 денари по ученик.

— реклама —

Според неа, еден оброк чини околу 2.500 денари, а разликата до целосниот износ ќе ја покриваат родителите. Таа оцени дека станува збор за делумно субвенционирање, а не за бесплатен оброк, како што било најавено пред изборите.

Ристовска Додевски посочи и дека Општина Центар среде ноември ја менува Програмата за образование, при што средствата за мерката „Бесплатен оброк за сите ученици“ се намалуваат од првично предвидените 15 милиони на осум милиони денари.

— реклама —

Таа побара одговор каде ќе бидат пренаменети преостанатите седум милиони денари и зошто се намалуваат средствата наменети за учениците. Според неа, родителите заслужуваат транспарентност и јасни информации за начинот на спроведување на мерката.

— реклама —

Ристовска Додевски нагласи дека ВМРО-ДПМНЕ ќе го поддржи субвенционираниот оброк доколку тој им помага на учениците и ги намалува трошоците на семејствата, но побара објаснување зошто родителите повторно треба да ја покриваат разликата во цената.

Таа потсети дека ветувањето за бесплатен оброк се најавува уште од 2021 година и оцени дека неговото постојано менување ја доведува во прашање реализацијата на преземените обврски кон граѓаните.

— реклама —