Контроверзниот српски трап-изведувач Драгомир Деспиќ – Десингерица, кој на 5 август треба да настапи на фестивал во Охрид, повторно предизвика бурни реакции во јавноста, овојпат со својот настап во хрватскиот град Водице.
Познат по екстремните сценски перформанси, Десингерица и овојпат приреди нешто што малкумина го очекуваа. Среде концертот во клубот „Ла Плаја“ тој повика млад човек од публиката на сцената и со машинка почна да му ја бричи главата. Не застана тука – по првиот посетител, уште неколку момчиња од првите редови доброволно седнаа пред него и беа избричени пред стотиците присутни.
Снимките за кратко време се проширија на социјалните мрежи и предизвикаа лавина реакции. Дел од посетителите го оценија потегот како уште еден дел од неговиот препознатлив провокативен сценски настап, додека други сметаат дека ваквите перформанси одамна ги надминале границите на добриот вкус.
Ова не е првпат Десингерица да приреди ваков перформанс. И минатата година, за време на настап во Нашице, на ист начин бричеше посетители од публиката.
Сепак, бричењето глави е само дел од неговиот репертоар. На своите концерти тој често плука кон публиката, ги полева посетителите со вода, ги удира со патика по главата и постојано прави потези што предизвикуваат контроверзии. И покрај тоа, неговите настапи низ регионот редовно се распродаваат, а тој е чест гостин и во Македонија.
Минатата година неговото име беше во центарот на вниманието и поради барањето на градоначалникот на Бања Лука, Драшко Станивуковиќ, да му се забранат настапите во Република Српска, со образложение дека има негативно влијание врз младите.
На тие критики Десингерица одговори дека не чувствува одговорност за туѓите деца.
„Дали лошо влијаам затоа што сум семеен човек, имам жена и дете? Затоа што имам добра кола и живеам како Бог? Јас би сакал моето дете да биде успешно како мене. Најважно е да имаш здраво семејство, а јас тоа го имам. Туѓите деца не се мој проблем. Јас правам музика за возрасни. Родителите нека си ги воспитуваат своите деца“, изјави тој за српските медиуми.
Инаку, Десингерица е роден во 1993 година во Белград. Пред музичката кариера тренирал кошарка во младинските категории на „Партизан“ и „Црвена Ѕвезда“, потоа работел како тату-артист, а на музичката сцена се проби во 2022 година заедно со Пљугица. Од самиот почеток кариерата ја гради преку провокации и необични настапи, поради што речиси секој негов концерт отвора дебата каде завршува сценскиот спектакл, а каде почнува непримерното однесување кон публиката.
И покрај сите контроверзии што го следат, Десингерица продолжува да привлекува илјадници обожаватели, а веќе на 5 август е најавен како еден од изведувачите на фестивал во Охрид.
