„Претрес со Ландов“ вечерва ја отвора четвртата сезона, а прв гостин ќе биде пратеникот и функционер на ДУИ, Блерим Беџети. Емисијата почнува во 21 часот и ќе се емитува во живо на landov.mk.
Разговорот ќе биде посветен на повеќе од две децении политичко влијание на ДУИ, период во кој партијата учествуваше во формирањето влади и во изборот на министри и раководители на институции.
Една од централните теми ќе биде тврдењето на ДУИ дека партијата и Албанците во Македонија се цел на политички удари, но и прашањето за одговорноста на партијата за состојбите во државата додека беше дел од власта.
Во интервјуто ќе се разговара за УЧК, Хашим Тачи и пресудата во Хаг, како и за улогата и односите меѓу Али Ахмети и Муса Џафери.
На масата ќе бидат и случајот со поранешниот вицепремиер Артан Груби, случувањата поврзани со Рамиз Мерко и лицата од ДУИ кои се најдоа на американската црна листа.
Беџети ќе одговара и на прашања за влијанието на ДУИ врз судството, Законот за употреба на јазиците, националистичката реторика и начинот на кој партијата ја користи етничката поделба во политичките пресметки.
Дел од разговорот ќе биде посветен на односите меѓу ДУИ и ВЛЕН, со прашањето колку двете политички структури навистина се разликуваат и дали граѓаните денес живеат подобро или полошо од претходно.
Ќе се разговара и за плановите на ДУИ за враќање на власт, можните разговори со ВМРО-ДПМНЕ и СДСМ и информациите за евентуални предвремени парламентарни избори.
Со првото издание почнуваат новите 11 месеци на „Претрес со Ландов“, под мотото на четвртата сезона – „Спиете ли мирно?“.
Првата емисија од четвртата сезона започнува вечерва во 21 часот, во живо на landov.mk.
