Шест куќи и викендички изгореа во големиот пожар што во текот на ноќта избувна во приморската општина Химара, на југот на Албанија. Пожарот бил ставен под контрола, но екипите и натаму се на терен за целосно да го локализираат.
Албанскиот министер за одбрана, Ермал Нуфи, изјави дека ситуацијата во Химара е целосно под контрола и дека нема опасност од натамошно ширење на огнот.
Во гаснењето учествувале повеќе од 170 припадници на вооружените сили, над 300 пожарникари и повеќе од 21 противпожарно возило. Воздушната интервенција започнала утрово во 6:30 часот.
Според Нуфи, во пожарот нема човечки жртви, ниту е причинета штета на деловни објекти, што, како што посочил, се должи на навремената интервенција на службите.
Пожарникарите и останатите екипи продолжуваат со работата на терен за пожарот целосно да биде изгаснат.
