(Видео) Петрушевски: Филипче молчел за скандалот на Славјанка вреден 37 милиони евра, а проговори откако се скараа

Заменик генералниот секретар на ВМРО-ДПМНЕ и пратеник Бране Петрушевски на денешната прес-конференција побара од Јавното обвинителство да го испита случајот со набавката за која претседателот на СДСМ, Венко Филипче, изнел обвинувања дека станува збор за криминал вреден 37 милиони евра.

Петрушевски на прес-конференција обвини дека Филипче не реагирал додека СДСМ бил на власт и додека Славјанка Петровска била министерка, туку за случајот проговорил откако, како што тврди, дошло до несогласувања меѓу нив.

— реклама —

„Додека СДС беше на власт, а Петровска беше министерка, Филипче молчеше. За набавката поскапа за 37 милиони евра се сети дури кога се скараа меѓусебно“, рече Петрушевски.

— реклама —

Тој посочи дека јавноста треба да добие одговори за наводите што ги изнел Филипче, нагласувајќи дека обвинувањето за криминал во ваков износ, според него, не треба да биде дел од партиска пресметка.

Петрушевски рече дека го поздравува тоа што Филипче јавно го отворил прашањето, но истовремено повика надлежните институции да го испитаат случајот.

— реклама —

„Го охрабруваме потегот на Филипче да проговори, но исто така го повикуваме и ЈО да го истражи случајот за кој, патем, се доставени сите информации до надлежните институции“, истакна Петрушевски.

— реклама —

„Правда мора да има“, порача тој.