Ербас, најголемиот светски производител на патнички авиони, соопшти дека успешно е извршен првиот тест-лет на првиот од 12 специјално модифицирани авиони А350-1000УЛР, нарачани од австралиската авиокомпанија Квантас за изведување на едни од најдолгите комерцијални летови во светот.
Авионот првпат полетал од Тулуз, Франција, и летал три часа и 43 минути над француска територија и дел од Атлантскиот Океан. Летот бил управуван од тест-пилотите на Ербас.
Од компанијата соопштија дека по завршувањето на програмата за тестирање, авионот ќе биде дополнително опремен според барањата на Квантас пред да биде испорачан на австралискиот превозник.
Квантас планира со овие авиони да ги реализира долгонајавуваните директни линии од Сиднеј до Лондон и од Сиднеј до Њујорк, без меѓуслетување.
„Успешниот прв лет го означува почетокот на двомесечната тест-програма“, соопштија од Квантас, додавајќи дека подоцна во јуни ќе биде објавена првата рута од таканаречениот „Проект Санрајз“, како и датумот за старт на комерцијалните летови.
Компанијата ги нарача 12-те авиони уште во 2022 година и првично планираше летовите да започнат до крајот на 2025 година. Сепак, проектот беше одложен поради проблеми во глобалните синџири на снабдување.
Во моментов не постојат директни летови меѓу источниот брег на Австралија и Европа.
Растојанието меѓу Лондон и Сиднеј изнесува околу 17.750 километри, додека линијата Сиднеј – Њујорк е пократка за повеќе од 1.500 километри. Сепак, според проценките, и двете рути ќе траат приближно исто – до 22 часа лет без прекин, поради различните воздушни струења и ветрови на рутите.
Доколку проектот биде реализиран според планот, Квантас ќе постави нов стандард во комерцијалната авијација со едни од најдолгите директни патнички летови досега.
