Градоначалникот на Скопје, Орце Ѓорѓиевски, најави дека е во тек темелна реконструкција на подната фонтана во центарот на градот, која, како што посочи, повторно ќе стане едно од најпрепознатливите обележја на Скопје.
Според Ѓорѓиевски, се работи на трајно решение кое опфаќа сервисирање на специјализираната опрема произведена во Германија и целосно враќање на функционалноста на автоматизираниот систем.
Тој информираше дека паралелно се врши и конструктивно унапредување на фонтаната, при што постојната носечка подконструкција се заменува со нова изработена од иноксни профили, што ќе обезбеди поголема стабилност, безбедност и долговечност на системот.
„Фонтаната повторно ќе биде место за средби, детска радост, фотографии, прошетки и убави спомени. Место кое ќе му ја врати живоста на плоштадот и повторно ќе стане една од најубавите слики од центарот на Скопје“, порача Ѓорѓиевски.
Тој додаде дека паралелно се врши и замена на оштетените плочки на потегот од Порта „Македонија“, со цел централното градско подрачје да добие уреден и достоинствен изглед.
