Пожар избувна во една од двете рафинерии за нафта во Австралија, при што е зафатен комплексот на компанијата Вива Енерџи во градот Џилонг по истекување на вентил во индустрискиот систем.
Според првичните информации, инцидентот се случил во средата доцна навечер по локално време, а пожарот бил предизвикан од мало истекување на гас по механички дефект на опрема. Пожарот бил изгаснат по околу 12 часа, но властите предупредуваат дека последиците врз производството сè уште се проценуваат.
Од компанијата Вива Енерџи соопштија дека дел од производните единици се погодени и дека производството на бензин, дизел и авионско гориво може да биде нарушено. Во моментов рафинеријата продолжува со ограничен капацитет, додека експертите проценуваат како ќе се стабилизира работењето.
Австралискиот министер за енергетика изјави дека инцидентот може да влијае врз снабдувањето со гориво во земјата, особено имајќи предвид дека Австралија увезува голем дел од рафинираните нафтени производи.
Од компанијата истакнаа дека не постојат индикации дека пожарот е поврзан со безбедносни пропусти или застарена опрема, туку дека станува збор за технички дефект.
