(Видео) „Правосудството треба да биде бастион на правдата, а не бастион на СДС и ДУИ“, вели Манасиевски

На денешната прес-конференција, портпаролот на ВМРО-ДПМНЕ, Валентин Манасиевски обвини дека случаите „Ласкарци“, „Модуларна болница“ и „Мазут“ се доказ за, како што тврди партијата, нефункционалноста на правосудниот систем и неговата поврзаност со поранешните владејачки структури.

Манасиевски посочи дека во случајот „Ласкарци“ има 16 жртви, но пресудата е укината, додека за пожарот во модуларната болница, во кој загинаа 14 лица, според него, нема обвинение. Тој го посочи и случајот „Мазут“, вреден 167 милиони евра, за кој истрагата била запрена.

— реклама —

Манасиевски оцени дека овие случаи не се случајност, туку, како што рече, последица на правосудниот систем кој бил поставен од СДСМ и ДУИ и кој и денес ги штити нивните луѓе и интереси.

„СДС и ДУИ ја загубија власта, но нивните судии и обвинители останаа последната линија на одбрана на системот што го создаваа со години“, рече Манасиевски.

— реклама —

Портпаролот на ВМРО-ДПМНЕ ги посочи Ислам Абази, Вилма Русковска, Добрила Кацарска и Африм Фидани како, според него, дел од судиите и обвинителите кои ги штитат поранешните функционери на СДСМ и ДУИ од одговорност.

Тој обвини дека кога треба да одговара некој од нивниот политички круг, предметите се одолговлекуваат, истрагите се затвораат, а пресудите се укинуваат.

— реклама —

„Тоа е причината зошто граѓаните не му веруваат на правосудството“, порача Манасиевски.

Тој додаде дека од Ласкарци и Модуларната болница, до случајот „Мазут“, станува збор за, како што оцени, истата правосудна мрежа која ги штити истите политички структури.

— реклама —

„Правосудството треба да биде бастион на правдата, а не бастион на СДС и ДУИ. Времето на недопирливите мора да заврши. Одговорност мора да има за секого“, порача Манасиевски.