Во раните утрински часови денеска на подрачјето на Скопје беше спроведена десеттата фаза од дезинсекцијата против возрасни форми на комарци, информираше градоначалникот Орце Ѓорѓиевски.
Според него, активностите ќе продолжат и утре, во согласност со Годишната програма, законските обврски и Елаборатот подготвен од Центарот за јавно здравје – Скопје.
Во текот на изминатите месеци беа реализирани повеќе третмани за сузбивање на ларвите и возрасните форми на комарците. Авионска дезинсекција против ларви беше спроведена на 7 мај, 11 јуни и 10 јули, додека теренски третмани беа извршени на 26 јуни и 23 јули.
За сузбивање на возрасните комарци беа реализирани авионски третмани на 1 и 2 јуни, како и на 27 и 28 јуни, додека теренска дезинсекција беше спроведена на 18 и 20 јуни, како и на 13 и 15 јули.
Ѓорѓиевски најави дека и следната недела ќе се реализира дополнителна теренска дезинсекција од земја, со цел дополнително намалување на бројот на комарците и заштита на здравјето на граѓаните.
Тој посочи дека Градот ќе продолжи со навремено и системско спроведување на мерките за заштита на јавното здравје и подобрување на квалитетот на живот на граѓаните.
