(Видео) Првата зимска бура ја погоди Газа: Поплавени десетици илјади шатори, има повредени

Околу 70.000 шатори во кои се сместени раселени Палестинци биле поплавени во Појасот Газа за само 12 часа по почетокот на првата зимска бура. Првичната штета се проценува на околу три милиони долари, соопшти владината канцеларија за медиуми во Газа.

Од таму информираат дека се урнале десетици ѕидови, има повредени, а оштетените згради претставуваат сè поголема опасност од уривање. Цивилната заштита примила околу 1.500 повици за помош во период од десет часа, додека во некои засолништа водата достигнала висина од 30 до 40 сантиметри.

— реклама —

— реклама —

Невремето дополнително ги оштетило објектите разурнати за време на војната што започна во октомври 2023 година. Во Нусеират спасувачите евакуирале жители од зграда што делумно се урнала поради силниот ветер и дождот, додека во северниот дел на Газа паднал ѕид од друга зграда, при што биле повредени две лица.

Особено загрозени се предвремено родените бебиња, постарите и болните. Директорот на болничкиот комплекс „Ал Шифа“ предупреди дека поплавувањето на одделението за итна помош го прекинало неговото функционирање околу четири часа. Тој предупреди и на зголемен ризик од цревни, респираторни и кожни инфекции поради мешањето на отпадните води со дождовницата во шаторите.

— реклама —

Според Комитетот за вонредни состојби во Газа, повеќе од еден милион раселени лица се соочуваат со тешка зима, а на територијата итно ѝ се потребни околу 200.000 шатори и средства за греење. Во крајбрежното подрачје Ал-Маваси, каде што живеат повеќе од 900.000 раселени лица, над 125.000 семејства се изложени на опасност морето да им ги однесе шаторите.

— реклама —

Палестинските хуманитарни организации предупредуваат дека во Газа дневно пристигнуваат само 180 до 200 камиони, наместо договорените 600, а само околу 40 од нив превезуваат хуманитарна помош. Според нивните информации, на египетската страна од границата чекаат 50.000 шатори.