Тројца убиени во израелски напади во Газа, меѓу ранетите и девојче

Израелските сили извршиле повеќе напади низ Појасот Газа во петокот, при што загинале тројца Палестинци, а четворица биле ранети, меѓу нив и едно дете. Нападите се случиле и покрај примирјето, кое е во сила од 10 октомври минатата година.

Во најновиот напад, израелско беспилотно летало погодило двор на семејна куќа во бегалскиот камп Нусејрат. Медицински извори потврдиле дека загинал еден Палестинец, чие тело било пренесено во болницата „Ал-Ауда“.

— реклама —

Претходно, друг Палестинец загинал во напад врз шатор поставен на покривот на куќа западно од градот Газа. Во уште еден напад, во близина на раскрсницата Ансар, југозападно од градот, бил убиен уште еден Палестинец, а едно лице било рането.

На југот на Појасот Газа, три лица, меѓу кои девојче и постара жена, биле ранети во пукање на израелската армија во областа Ал-Маваси и во близина на населбата Хамад Сити, северозападно од Кан Јунис.

— реклама —

Сведоци изјавиле дека израелски воени возила отвориле оган кон станбени области и шатори за раселените лица на север, исток и југ од Кан Јунис. Според нивните наводи, израелски воени бродови исто така ја гранатирале крајбрежната област на градот.

Локални извори наведуваат дека израелската армија урнала повеќе куќи и згради во населбата Ал-Туфах, источно од градот Газа.

Израелски борбени авиони извршиле најмалку два напади врз напуштени згради во населбите Ал-Туфах и Шеџаија, но во тие напади немало жртви.

— реклама —

Во централниот дел на Газа, израелската артилерија ги гранатирала источните делови на Деир ал-Балах и бегалскиот камп Ал-Магази, додека областа била изложена и на пешадиски оган.

Според податоците на Министерството за здравство во Газа, во досегашните израелски прекршувања на договорот за прекин на огнот загинале 1.439 Палестинци, а 5.052 биле ранети.

— реклама —

Од 8 октомври 2023 година, според податоците на палестинските власти, во Појасот Газа загинале повеќе од 74.000 Палестинци, додека повеќе од 175.000 се ранети.

Според истите податоци, околу 90 отсто од инфраструктурата во енклавата е уништена.