Осумнаесетгодишно момче е убиено, а уште три лица се повредени во вооружен напад што се случил по церемонија на доделување дипломи во градот Ферфилд, северно од Сан Франциско.
Според локалните власти, полицијата интервенирала околу 19:15 часот по локално време, по пријава за пукање на паркинг во близина на средно училиште.
Меѓу повредените се 11-годишно дете, како и две лица на возраст од 20 и 25 години. Од полицијата соопштија дека истрагата е во тек и дека засега нема информации што укажуваат на непосредна закана за безбедноста на заедницата.
Детали за можниот напаѓач сè уште не се соопштени.
Според училишниот округ Ферфилд-Суисун, инцидентот се случил по церемонијата за доделување дипломи на средното училиште „Сем Јето“, кое го дели кампусот со средното училиште во Ферфилд.
Очевидци изјавиле дека во моментот на пукањето на паркингот имало ученици, членови на нивните семејства и пријатели што фотографирале матуранти. По истрелите настанала паника, а присутните почнале да бегаат во обид да се спасат.
