(Видео) Рама постави столици пред Владата и ги повика студентите на дијалог, тие го одбија

Албанскиот премиер Еди Рама ги повика студентите кои осум дена протестираат во Тирана на дијалог, но демонстрантите ја одбија поканата и продолжија да бараат оставки.

Пред зградата на Владата биле поставени неколку столици, слични на оние во кабинетот на премиерот, а Рама објавил видео во кое се подготвува за разговор со студентите.

„Кој сака безусловен дијалог – каде и кога и да посака, па дури и овде, ако им одговара – јас сум на располагање, заедно со Владата“, изјави Рама во видео објавено на неговиот профил на Фејсбук.

— реклама —

Во меѓувреме, професори се собраа пред Политехничкиот универзитет во Тирана за да им дадат поддршка на студентите. Тие го повикаа премиерот да ги слушне нивните барања, посочувајќи дека за време на протестите биле сведоци на насилство врз младите.

— реклама —

„Видовме неидентификувани цивили како ги следат студентите. Бруталноста врз албанската младина е неприфатлива“, изјави еден од предавачите.

Професорите упатија и апел до меѓународната заедница да обрне внимание на случувањата во Албанија и на, како што наведоа, насилството врз младите.

— реклама —

На демонстрантите им се обрати и Мањола Хаса, директорка на Агенцијата за медиуми и информации, која го повтори повикот за дијалог од кабинетот на премиерот. Но, студентите ја одбија и побараа таа да си замине, извикувајќи: „Нема да запреме додека нема оставка! Повлечете се, повлечете се! Сакаме оставка!“

Во меѓувреме, адвокатката Бризида Ѓиконди и други активисти поднесоа кривична пријава до Специјалното обвинителство против директорот на Државната полиција, Скендер Хита, и премиерот Еди Рама. Пријавата се однесува на употребата на сила врз демонстрантите за време на осумдневните протести.

Од Социјалистичката партија пристигна поинаква порака. Шефот на пратеничката група, Таулант Бала, изјави дека кревањето рака против државата е кривично дело и дека крвта на секој полицаец ја претставува крвта на државата.

Осврнувајќи се на младите кои учествуваат во протестите, Бала тврдеше дека тие се користат како „топовско месо“ од странски сили. Тој додаде дека малолетниците треба да бидат заштитени и да не бидат изложени на влијанија од други.