(Видео) Реките во Европа пресушуваат: Загрозени транспортот, индустријата и производството на струја

Европа се соочува со сериозни последици од продолжените топлотни бранови, кои доведоа до историски ниски водостои на реките Рајна и Дунав, предизвикувајќи проблеми во транспортот, индустријата и енергетскиот сектор.

Намалениот водостој значително го отежнува превозот на суровини, хемикалии, нафтени деривати и друга стока по најважните европски внатрешни водни патишта, што дополнително ги зголемува трошоците за транспорт и создава притисок врз економијата.

Во исто време, високите температури ја ограничуваат работата на нуклеарните електрани во повеќе европски земји, меѓу кои Франција и Унгарија, бидејќи недостигот на вода го отежнува ладењето на реакторите.

— реклама —

Кај германскиот град Кауб, кој претставува една од најважните мерни точки на Рајна, водостојот се намали на само 25 сантиметри, изедначувајќи го рекордот од 2018 година. Според прогнозите, нивото би можело дополнително да се намали и да достигне најниска вредност откако се вршат мерења.

Германските компании веќе преземаат мерки за да ги намалат последиците. Хемискиот гигант BASF соопшти дека развил алтернативни, иако поскапи, начини за транспорт, додека енергетските компании создаваат дополнителни резерви на јаглен и разгледуваат можност дел од испораките да ги пренасочат кон железничкиот транспорт.

— реклама —

Експертите предупредуваат дека и покрај адаптацијата, повисоките транспортни трошоци ќе ја намалат конкурентноста на европската индустрија во однос на производителите од Азија и Северна Америка.

Според научниците, долготрајните периоди без врнежи, во комбинација со високите температури, ја исушуваат почвата, која потоа ја впива и малата количина дожд пред водата да стигне до реките. Климатските промени дополнително го засилуваат овој процес.

Нискиот водостој создава сериозни проблеми и на Дунав. Пловидбата во делови од Романија и Словачка е отежната, а во Унгарија единствената нуклеарна електрана е принудена значително да го намали, а во одредени периоди и целосно да го прекине производството на електрична енергија. Поради тоа земјата ќе мора да го зголеми увозот на струја.

— реклама —

Во Романија постои опасност од ограничување на работата на нуклеарната електрана Черна Вода, додека Франција веќе воведе ограничувања во производството на дел од своите нуклеарни централи поради високата температура на речната вода што се користи за нивно ладење.

Проблеми има и во Италија, каде реката По е под историскиот просек, што го загрозува наводнувањето на земјоделските површини и овозможува навлегување на солена вода во делтата.

Метеоролозите не очекуваат значително подобрување во скоро време. Прогнозите покажуваат дека температурите ќе останат значително над просекот, а пообилни врнежи кои би можеле да ја ублажат сушата не се очекуваат пред доцна есен.

Научниците предупредуваат дека ваквите екстремни суши и топлотни бранови ќе стануваат сè почести и поинтензивни доколку не се намали употребата на фосилните горива и не се забават климатските промени.