Дека дисциплината и почитувањето на правилата се длабоко вкоренети во јапонското општество, потврдува и видеото што деновиве привлече големо внимание на социјалните мрежи по натпреварот на јапонската фудбалска репрезентација на Светското првенство.
Иако турнирот штотуку започна, јапонските навивачи веќе се најдоа во центарот на вниманието поради своето однесување. Откако претходно беа забележани како ги чистат трибините и соблекувалниците по натпреварите, сега покажаа дека не ги забораваат правилата ниту во моменти на голема еуфорија.
Јапонија неодамна одигра нерешено 2:2 против фаворизираната Холандија, а освоениот бод беше дочекан како голем успех, особено ако се има предвид дека Јапонците двапати имаа резултатска негатива и до израмнување стигнаа во 89. минута.
Прославата на улиците низ земјата била бурна, но и примерна. Видеото што стана вирално прикажува група навивачи кои слават на пешачки премин додека е вклучено зеленото светло за пешаците. Во моментот кога семафорот се префрла на црвено, сите веднаш се повлекуваат од коловозот за автомобилите непречено да продолжат да се движат.
Токму оваа сцена уште еднаш покажа зошто Јапонија често се наведува како пример за дисциплина, почитување на правилата и чувство за заедничка одговорност, дури и во мигови на голема радост.
Погледнете го видеото и уверете се зошто многумина коментираат дека ваква прослава може да се види само во Јапонија.
