Американскиот претседател Доналд Трамп застана во одбрана на својот син Доналд Трамп Џуниор, откако руски олигарх поврзан со Кремљ помогнал да се платат трошоците за неговите свадбени прослави.
На прашањето дали било соодветно неговиот син да ги прифати тие пари, Трамп во Овалната соба во петокот одговорил дека тоа е „целосно дозволено“.
„Но, колку што знам, тој му ги вратил парите“, додал Трамп.
Трамп рекол дека слушнал оти неговиот син првично не сакал да ги прифати парите.
„Личноста која ја познава, претпоставувам негов пријател, му приредила свадбена прослава“, рекол претседателот. „Тоа е многу вообичаено.“
Трамп додал дека и самиот организирал свадбени прослави за многумина, меѓу другото и на својот имот Мар-а-Лаго на Флорида.
Истражувачкиот портал „ПроПаблика“ на почетокот на оваа недела објавил дека рускиот олигарх Умар Кремлев помогнал да се финансираат свадбените прослави на Трамп Џуниор и неговата сопруга Бетина на Бахамите во мај.
Кремлев, според извештајот, ги покрил трошоците во вредност од неколку стотици илјади долари. Изнајмувањето на еден од приватните острови на кои се одржувале свадбените прослави чинело околу 100.000 долари по ноќ, а огнометот околу 70.000 долари.
Кремлев е претседател на Меѓународната боксерска асоцијација (IBA) и има блиски врски со рускиот претседател Владимир Путин.
Според „ПроПаблика“, Кремлев го запознал Трамп Џуниор само кратко време пред свадбата, но присуствувал на прославите со поголема група руски гости.
Трамп Џуниор и неговата сопруга потврдиле дека Кремлев бил домаќин на две вечери, а Бетина во објава на Инстаграм го опишала настанот како „исклучително дарежлив свадбен подарок од пријател“.
Претседателот Трамп со години бил под лупа поради неговите врски со Русија. Во двопартиската истрага на Комитетот за разузнавање на американскиот Сенат било заклучено дека Русија настојувала да влијае врз претседателските избори во 2016 година во корист на Трамп.
