СДСМ денеска преку прес-конференција побара оставка од министерот за внатрешни работи Панче Тошковски, обвинувајќи го за, како што велат, целосен распад на безбедносниот систем по бегството на Александар Лазаров – „Цуната“, по кого МВР распиша меѓународна потерница.
Од партијата тврдат дека Лазаров, кого го поврзуваат со дискотеката „Пулс“ и со пратеникот Миле Лефков од ВМРО-ДПМНЕ, успеал да ја напушти државата, оценувајќи дека станува збор за уште еден пример на институционален неуспех.
„Прво му го отворија прозорот во полициската станица, а потоа му дозволија да избега. Дури откако замина, распишаа меѓународна потерница. Тоа е веќе видено сценарио кога станува збор за ВМРО-ДПМНЕ и Тошковски“, соопштија од СДСМ.
Според опозициската партија, наместо криминалците да завршуваат во затвор, тие добиваат можност да избегаат, а никој не сноси одговорност.
„Ова е целосен распад и класична злоупотреба на безбедносниот систем, за што мора да има политичка и кривична одговорност“, наведуваат од СДСМ.
Партијата бара целосно расчистување на случајот, утврдување на одговорност кај сите инволвирани и оставка од министерот Панче Тошковски.
