СДСМ на денешната прес-конференција обвини дека со предложениот ребаланс на Буџетот Владата ги намалува средствата наменети за младите и побара преку амандмани да се обезбедат дополнителни пари за студентите, учениците и образованието.
Од партијата тврдат дека со ребалансот се кратат еден милион денари од програмата за млади, додека средствата за демографски политики се намалуваат за околу 70 проценти.
Според СДСМ, наместо да инвестира во младите, власта ги намалува средствата во време кога, како што наведуваат, голем број млади размислуваат да ја напуштат државата.
Од опозициската партија информираа дека во Собранието поднеле повеќе амандмани со кои бараат дополнителни 150 милиони денари за зголемување на студентскиот оброк, шест милиони денари за повисоки студентски стипендии, како и повеќе средства за реконструкција на студентските домови.
СДСМ предлага и издвојување 243 милиони денари за бесплатен училишен оброк во основните училишта, дополнителни средства за подобрување на пристапот до образование за учениците со попреченост и посебни образовни потреби, како и 200 милиони денари за опремување на основните и средните училишта со современа научна технологија.
Воедно, од партијата бараат и поголема финансиска поддршка за учениците кои учествуваат на меѓународни натпревари и олимпијади.
Од СДСМ порачаа дека очекуваат власта да ги прифати предложените амандмани и средствата да ги пренамени кон младите, наместо, како што наведуваат, кон непродуктивни трошоци.
