Почна уривањето на објектот „Али Тобако“ на Бит Пазар, кој со години се наоѓаше на пешачката и велосипедската патека, покажуваат снимките на “Скопје1”.
Отстранувањето следува откако градоначалникот на Скопје, Орце Ѓорѓиевски, најави дека ќе се расчистуваат дивопоставените објекти кои, како што рече, го узурпираат јавниот простор и го попречуваат движењето на граѓаните.
„На Бит Пазар има едно тобако коешто невозможно е да се функционира од тоа тобако, на сред велосипедска и пешачка патека, ќе биде отстрането. Секаде каде што имаме узурпација на државен простор и невозможно функционирање на граѓаните, таму ќе постапуваме. Мораме да градиме систем во кој ќе има ред“, изјави Ѓорѓиевски пред четири месеци.
Тој претходно посочи дека станува збор за објекти кои немаат соодветна документација и кои, според него, со години биле толерирани на штета на јавниот интерес.
„Ред ќе има. Знам дека во одредени процеси некој нема да го прими тоа позитивно, затоа што му го нарушуваме комодитетот кој 30 години некој му го дозволил на сметка на граѓаните и на градот. Тоа се објекти кои узурпираат велосипедски и пешачки зони, но и градски зелени површини“, рече градоначалникот.
Отстранувањето на „Али Тобако“ е дел од најавената акција за расчистување на дивопоставените времени објекти во Скопје, за кои градските власти најавија дека ќе бидат отстранети доколку немаат законска документација или го попречуваат нормалното користење на јавните површини.
