Американски стратешки бомбардер Б-52 „Стратофортрес“ се урна во Калифорнија кратко по полетувањето од воздухопловната база Едвардс, јавува Би-Би-Си.
Инцидентот се случил околу 11:20 часот по локално време, а од базата потврдија дека авионот се срушил непосредно по полетувањето. Засега нема официјални информации за бројот на жртви или повредени, но според првичните информации постојат стравувања дека во леталото нема преживеани.
На местото на несреќата веднаш биле испратени спасувачки и противпожарни екипи.
„На местото на несреќата веднаш се упатени итните служби и ситуацијата е во тек. Повеќе информации ќе бидат објавени штом станат достапни“, соопштија од воздухопловната база.
Снимки од воздух покажуваат голема опожарена површина и густ црн чад кој се издига над местото каде што се урнал авионот.
Б-52 „Стратофортрес“ е еден од најпрепознатливите авиони во американската воена историја и е во употреба уште од 1950-тите години. Станува збор за стратешки бомбардер со долг дострел, способен да носи конвенционално и нуклеарно вооружување.
Леталото може да достигне височина од околу 15.000 метри и да понесе товар од повеќе од 30 тони. Благодарение на можноста за дополнување гориво во воздух, неговиот оперативен дострел практично е неограничен.
Вообичаено, екипажот на Б-52 го сочинуваат пет лица – командант, пилот, навигатор, радарски навигатор и офицер за електронско војување.
Причините за несреќата засега не се познати, а надлежните служби започнаа истрага.
