(Видео) Се урна дел од зградата на судот во Италија, една жена е повредена

Голем дел од зградата на судот во италијанскиот град Болцано се урна рано утринава, додека во објектот се изведувале работи за реконструкција и проширување. Според првичните информации, најмалку една четвртина од зградата е уништена, а едно лице се здобило со полесни повреди.

Повредена е вработена во компанија за чистење, која успеала да ја напушти зградата непосредно пред уривањето. На местото веднаш пристигнале екипи на пожарникари, полиција и итна медицинска помош, додека експерти ја проверуваат стабилноста на објектот и можноста од нови уривања.

Главниот обвинител Аксел Бизињано изјави дека централниот дел од судската зграда е целосно неупотреблив.

— реклама —

„Сè уште е прерано да се зборува за причините. Во моментов приоритет е што побрзо да го обновиме функционирањето на судот и да најдеме решение за прераспределба на вработените“, изјавил Бизињано.

Жителите од околните згради раскажале дека слушнале силен татнеж, кој, според нив, звучел како земјотрес, по што следувало уривањето и голем облак прашина.

Гувернерот на Јужен Тирол, Арно Компачер, изјави дека зградата е во сопственост на покраината од 2018 година и дека реконструкцијата била дел од повеќегодишен план за обновување на правосудните објекти.

— реклама —

Тој нагласи дека ќе се испита дали градежните работи имаат врска со денешното уривање, а во меѓувреме веќе се бараат алтернативни простории за судските институции.

— реклама —

„Имавме огромна среќа. Не можам ни да замислам што ќе се случеше доколку уривањето се случеше подоцна во текот на денот. Најважно е што нема загинати и потешко повредени“, изјави Компачер.

Главниот противпожарен инспектор Кристијан Ауер рече дека првично постоел сомнеж дека станува збор за експлозија.

„Во првиот момент помисливме дека има бомба или напад, но по првите проверки утврдивме дека станува збор за нарушена статичка стабилност. Во објектот веќе имаше проблеми со продирање вода, а во тек беа и градежни работи“, изјави Ауер.

Домарот на судот, Федерико Роса, кој во моментот на несреќата бил во зградата, изјави дека се чувствува како чудесно да бил спасен.

„Околу 6:05 часот го слушнав уривањето. Го евакуиравме персоналот за чистење и веднаш ги повикавме службите за итни случаи. Најважно е што сите успеаја да излезат живи и неповредени“, рече Роса.