Градоначалникот на Општина Центар, Горан Герасимовски, денеска изврши увид на терен на булеварот „Теодосиј Гологанов“, во близина на Католичката црква, каде се спроведуваат итни мерки за стабилизација и обезбедување на просторот по евидентираното свлечиште во близина на градежен зафат.
На терен, заедно со Герасимовски, беа и деканот на Градежен факултет, инспекциските служби на Општина Центар и стручни лица.
Според стручните насоки и експертското мислење на Градежниот факултет, започнало затрупување и дополнително обезбедување на земјиштето на градилиштето, со цел стабилизација на теренот и спречување на нови оштетувања.
„Безбедноста на граѓаните нема цена. Од првиот момент реагиравме веднаш, а денеска на терен заедно со стручните лица ги следиме активностите за стабилизација на просторот“, изјави Герасимовски.
Тој упати благодарност до деканот и стручниот тим на Градежниот факултет за брзата реакција и експертската помош.
Од Општина Центар информираат дека инспекциските служби и понатаму остануваат на терен и продолжуваат со надзорот. Досега биле изречени повеќе санкции, а постапките против инвеститорот и изведувачот продолжуваат.
Според општината, било утврдено дека дел од градежните активности не биле изведувани согласно одобрението за градење издадено од Општина Центар.
Општината најави дека ќе продолжи со активности за обезбедување на просторот и утврдување одговорност за сите констатирани неправилности.
