(Видео) Штерјова: Оставка од Тошковски и одговорност за сите вмешани што ја пуштија Михаилова

На денешната прес-конференција, Кети Штерјова бара итна оставка од министерот за внатрешни работи Панче Тошковски и целосно расчистување на случајот со Ива Михаилова, која ја напуштила државата и покрај тоа што судот ѝ ги одзел македонскиот и бугарскиот пасош.

Штерјова побара одговорност од сите за кои ќе се утврди дека биле вмешани во случајот, од лицата што наводно договарале и давале инструкции до оние што постапувале или пропуштиле да постапат.

— реклама —

Од СДСМ тврдат дека јавноста мора да дознае кој го овозможил заминувањето на Михаилова и по чиј налог. Штерјова посочи дека таа јавно изјавила оти границата ја поминала легално, со лична карта, и дека граничните службеници биле запознаени со тоа, додека МВР соопштило дека нема евидентиран излез од државата.

— реклама —

Од партијата изразуваат сомнеж дека случајот бил договорен и го поврзуваат со посетата на министерот за надворешни работи Тимчо Муцунски на Софија. Сепак, станува збор за тврдења на СДСМ, а не за утврдени факти.

Штерјова оцени дека случајот отвора сериозни прашања за безбедноста на граѓаните, еднаквоста пред законот и способноста на Министерството за внатрешни работи да ги извршува своите обврски.

— реклама —

Во своето обраќање, таа посочи и на други случаи за кои СДСМ претходно реагирал, меѓу кои запленетите пет тони дрога, бегство на осомничен од полициска станица, инциденти на северната граница и наводни пропусти во постапувањето по пријави за насилство.

Од СДСМ повторно побараа целосно испитување на случајот со Михаилова, утврдување на одговорноста на сите евентуално вмешани и оставка од министерот Тошковски.