(Видео) Штерјова: Сè е фарса, ја пуштија Михаилова сега глумат дека ја бараат - Мицкоски го штити Тошковски

На денешната прес-конференција, Кети Штерјова обвини дека власта се обидува да ја префрли одговорноста за случајот со Ива Михаилова, наместо да утврди како таа ја напуштила земјата.

Штерјова изјави дека актуелните потези на институциите се обид за создавање привид на постапување и оцени дека премиерот Христијан Мицкоски го штити министерот за внатрешни работи Панче Тошковски.

— реклама —

Според Штерјова, наместо да се побара одговорност од надлежните, власта води медиумска кампања, ја префрла вината врз СДСМ, Венко Филипче и Зоран Заев и презема активности што таа ги оцени како театар. Како примери ги посочи повикувањето на бугарскиот амбасадор, распишувањето потерница и барањето притвор за Михаилова.

Од СДСМ тврдат дека границата не е соодветно контролирана и дека одговорноста за нејзиното функционирање е кај институциите предводени од актуелната власт. Штерјова обвини и дека полицијата се користи за заштита на интересите на власта, наместо за спроведување на законот.

— реклама —

На прес-конференцијата таа отвори и други прашања, меѓу кои случајот со петте тони дрога, примената на системот „Безбеден град“ без соодветна законска рамка, постапувањето во случаи на семејно насилство и ослободувањето на Артан Груби од куќен притвор.

— реклама —

Штерјова ја обвини власта и за влијание врз правосудството, наведувајќи дека премиерот јавно коментира за обвинители и судски постапки. Таа се повика и на извештајот на Европската комисија, за кој оцени дека содржи сериозни забелешки за мешање во правосудниот систем.

Од СДСМ тврдат дека институциите не постапуваат еднакво во сите случаи, посочувајќи на, како што велат, различен однос кон пријавите за закани и напади, како и кон сомнежите за криминал поврзан со тендери.

„Додека арамијата ја води бандата, правосудството е само театарска сцена“, порача Штерјова, обвинувајќи ја власта дека избегнува одговорност за случаите што ги отвора опозицијата.