(Видео) Силен земјотрес од 7,4 степени го погоди Јапонија, издадено предупредување за цунами

Јапонија беше погодена од земјотрес со јачина од 7,4 степени според Рихтеровата скала, при што веднаш беше издадено предупредување за цунами и се очекуваат бранови високи до три метри, јавуваат јапонските медиуми.

Според последните информации, цунами-бран веќе пристигнал до крајбрежјето на префектурата Ивате. На жителите во крајбрежните области им е препорачано итно да се евакуираат и да се упатат кон повисоки и безбедни зони, далеку од морето и устијата на реките.

— реклама —

Јапонска метеоролошка служба првично соопшти дека може да дојде до промени на нивото на морето, но подоцна предупредувањата беа засилени поради ризик од цунами. Според податоци на Европско-медитеранскиот сеизмолошки центар, потресот траел околу 20 до 30 секунди и предизвикал силно нишање на објектите.

— реклама —

Поради земјотресот е прекинат сообраќајот на брзиот воз Тохоку Шинкансен меѓу Токио и Шин-Аомори, а надлежните служби проверуваат дали има оштетувања во нуклеарните централи Фукушима Даичи и Фукушима Даини, како и во постројките во Онагава и Хигашидори.

— реклама —

Јапонските власти продолжуваат со следење на ситуацијата и предупредуваат дека опасноста од последователни бранови сè уште не е целосно исклучена.