Силно невреме денеска го зафати северниот дел на Балканот, откако временската промена од северна Италија и Алпите се прошири кон Словенија и Хрватска. Невремето донесе поројни врнежи, силен ветер, град и проблеми во повеќе места.
Во Словенија се измерени удари на ветер со брзина до 103 километри на час, додека во северна Италија силниот ветер и обилниот дожд соборуваа дрвја и предизвикуваа поплави. Невремето стигна и до Хрватска, каде што се регистрирани обилни врнежи во Риека и силни налети на ветер во западниот дел на Загреб.
Станува збор за изразена промена на времето, поврзана со студен фронт, кој од запад преку северна Италија и Алпите се движи кон Словенија, Хрватска и останатиот дел од западниот Балкан. Судирот на постудениот воздух со топол и влажен воздух над Средоземното Море создава услови за силни грмотевични процеси, поројни врнежи, град и бурни налети на ветер.
Невремето најпрво ја зафати западна Словенија, а потоа се прошири кон внатрешноста на земјата. Околу пладне стигна и до Љубљана, каде што делови од градот останаа без електрична енергија.
На словенечкото крајбрежје најсилните налети биле околу 50 километри на час, но метеоролошката станица Канин измерила удар на ветер од дури 103 километри на час. За Приморска било издадено портокалово предупредување, кое потоа било проширено на поголем дел од земјата поради најавените обилни врнежи.
За југозападна Словенија во вечерните часови е најавен нов невременски систем, кој би можел да биде уште посилен. Дополнителен проблем може да претставуваат врнежите во четврток, кога локално од словенечка Истра до централна Словенија за кратко време би можеле да наврнат околу 100 литри дожд на квадратен метар, а на одделни места и повеќе.
Силно невреме ја зафати и северна Италија. Во Ломбардија е издадено портокалово предупредување, а особено погодено е подрачјето на Бреша, каде што пожарникарите имале околу 50 интервенции поради последиците од силниот ветер и дождот. Биле соборени дрвја, а некои објекти биле поплавени. Во Вал Камоника во текот на ноќта паднал и град.
Во Милано околу 5:30 часот започнале грмежи, проследени со силен ветер и молњи, поради што градските власти одлучиле да ги затворат парковите. Интервенции имало и во Комо, каде што силните налети на ветер соборувале дрвја.
Временската промена носи и значителен пад на температурите. Портокалово предупредување е издадено и за делови од Ломбардија, Венето и Емилија-Ромања, додека жолто предупредување важи и во Фурланија-Јулиска Краина и Словенија. Се очекуваат силни врнежи, град и налети на ветер.
Невремето во претпладневните часови го зафати и северниот Јадран, Горски Котар, а потоа почна да се шири кон централните делови на Хрватска.
Во Загреб денот започнал сончево, но небото набрзо се наоблачило, а околу 13:30 часот започнал да дува силен ветер. Налетите предизвикале проблеми на повеќе места во градот. Силен ветер урнал подвижен тоалет врз заштитна ограда, поради што бил запрен трамвајскиот сообраќај, а низ улиците летале и канти за отпадоци и сообраќајни знаци.
Хрватската Државна метеоролошка служба ги предупреди граѓаните да бидат внимателни поради можноста за појава на посилни грмотевични невремиња, особено на отворен и изложен терен, во планинските и шумските подрачја и на ливадите.
Во услови на ширење на студениот фронт кон западниот Балкан, вниманието сега е насочено кон понатамошното движење на невремето и можноста неговото влијание да се прошири и кон Србија и другите делови од регионот.
