(Видео) Силно невреме ја погоди Германија: Тешко повредени, урнати дрвја и прекини во железничкиот сообраќај

Силно невреме проследено со бурни ветрови предизвика голема материјална штета и повеќе повредени лица во западните и југозападните делови на Германија. Првата есенска бура годинава уривала дрвја, оштетувала објекти и предизвикала прекини во снабдувањето со електрична енергија, додека железничкиот сообраќај на повеќе места бил нарушен.

Две лица се тешко повредени вчера попладне во градот Настетен, западно од Франкфурт, откако силен налет на ветер урнал конструкција во близина на пазар. Според полицијата, едно од повредените лица со хеликоптер било пренесено во болница и се наоѓа во критична состојба.

— реклама —

Во Селигенштат, југоисточно од Франкфурт, гранка од дрво паднала врз велосипедист, по што пожарникарите морале да интервенираат за да го ослободат. Во градот Лебах, пак, пешак бил полесно повреден откако врз него паднал рекламен билборд.

— реклама —

Невремето предизвикало сериозни проблеми и во железничкиот сообраќај. На главната железничка станица во Карлсруе патници пријавиле силно искрење откако предмет удрил во надземната електрична мрежа.

— реклама —

Во близина на Ахен, меѓуградски воз со 280 патници морал да биде извлечен со дизел-локомотива поради оштетување на електричните водови. Паднати дрвја ги блокирале железничките пруги и во близина на Нојс и Штутгарт.

Пожарникарските и полициските екипи продолжуваат со расчистување на урнатите дрвја и гранки, како и со отстранување на последиците од невремето. Во одделни населени места жителите привремено останале без електрична енергија.

Според прогнозите на Германската метеоролошка служба, бурата „Остен“ се движи кон Данска и Балтичкото Море, но опасноста за Германија сè уште не е помината.

Метеоролозите предупредуваат дека во текот на ноќта се очекува нова бура која би можела да зафати делови од земјата и да донесе обилни врнежи од дожд.