Јаник Синер мораше да побара медицинска помош за време на мечот против Хуан Мартин Серундоло на Ролан Гарос, што предизвика бројни реакции и контроверзии.
Најдобриот тенисер во светот водеше со 5:1 во третиот сет и изгледаше дека сигурно оди кон победа, но потоа почна да има проблеми.
Серундоло намали на 5:4, а кога стигна до три брејк-топки, Синер побара помош.
„Ако сега изгубам време, како функционира тоа? Не можам да го направам тоа. Не можам да чекам“, му рекол Синер на судијата.
Арбитерот му одговорил дека или ќе добие опомена поради одолговлекување или мора да биде повикан физиотерапевт за да се утврди проблемот.
Италијанскиот тенисер потоа изјавил дека не знае дали станува збор за дехидрација, а во разговорот додал и дека му се врти во главата и има потреба од повраќање.
Синер го напушти теренот за преглед кај физиотерапевт, а потоа повторно се врати и го продолжи натпреварот.
Сепак, Серундоло успеа да направи брејк, а потоа со нов пресврт го доби сетот со 7:5 и намали на 2-1.
По сетот следуваше уште една подолга пауза, па Синер вкупно помина околу 20 минути надвор од теренот, во климатизирани услови, додека Аргентинецот чекаше на температура повисока од 30 степени Целзиусови.
Поранешниот тенисер и коментатор Џим Куриер ја коментираше ситуацијата со зборовите:
„Очигледно се работи за грчеви... прават исклучоци од правилата за најдобрите играчи.“
