(Видео) Снимка од пронаоѓањето на пола милион евра скриени во минибус кој бил запрен на ГП Табановце

Царинската управа соопшти дека е реализирана историски најголема заплена на девизи, откако на граничниот премин Табановце биле откриени 500.000 евра скриени во специјално изработен бункер во минибус.

Директорот на Царинската управа, Бобан Николовски, на прес-конференција информираше дека акцијата ја реализирал Секторот за контрола и истраги преку Одделението за оперативни работи.

— реклама —

„Секторот за контрола и истраги преку Одделението за оперативни работи спречи обид за нелегален пренос на готовина во износ од пола милион евра пронајдени во бункер на минибус, што резултираше со историски најголема заплена на девизи“, рече Николовски.

Според информациите, девизите и возилото биле трајно одземени, а против возачот – државјанин на Албанија со иницијали Џ.Г. – била поведена постапка и веќе е донесена судска пресуда од Основниот суд Куманово.

Обидот за криумчарење бил откриен при влез во државата, кога за детална контрола бил издвоен минибус сопственост на туристичка агенција од Албанија, во кој се превезувале седум патници.

— реклама —

Во акцијата учествувале мобилен тим, К9 единица и Службата за мобилни скенери

„Мобилниот тим кој поседува огромно искуство веднаш забележа преправки на возилото, по што е пуштено царинско куче кое укажа на индиции за криумчарење на истото место“, изјави Николовски.

— реклама —

Сомнежите биле потврдени по скенирање на возилото, а потоа инспекторите го отвориле бункерот.

„Инспекторите од мобилниот тим пристапија кон отстранување на профилот во кој пронајдоа вкупно 14 проѕирни ќеси во кои беа спакувани 500 илјади евра“, додаде директорот.

Николовски порача дека секој обид за нелегален прекуграничен пренос на готовина ќе биде најстрого санкциониран и упати благодарност до тимовите кои учествувале во акцијата.

Согласно закон, запленетите девизи се предадени на Агенцијата за одземен имот, од каде потоа биле депонирани во Народната банка.

View this post on Instagram