(Видео) Со песната „Во борба, македонски народе“, македонски знамиња и пораки за антифашизмот, СДСМ одржа марш во Прилеп

Со песната „Во борба, во борба, во борба, македонски народе“, македонски знамиња и транспарентот „Непокор. Борба. Иднина – 85 години антифашизам“, учесниците на маршот на СДСМ денеска во Прилеп го одбележаа 11 Октомври – Денот на народното востание.

Маршот се одржа под слоганот „Непокор. Борба. Иднина – 85 години антифашизам“, а учесниците ја пееја песната посветена на борбата за слобода:

— реклама —

„Во борба, во борба, во борба,
македонски народе.
За света народна слобода
со песни и радост се мрее!“

View this post on Instagram

— реклама —

На маршот се обрати и претседателот на СДСМ, Венко Филипче, кој порача дека антифашистичките вредности се темел на македонската државност и дека борбата за слобода и правда продолжува и денес.

„Антифашизмот е нашиот темел, борбата за слободна и праведна Македонија е наша обврска“, истакна Филипче.

Тој рече дека СДСМ се смета за наследник на државотворните политики и вредностите на антифашистичката борба, нагласувајќи дека денешните предизвици бараат истрајност и демократска борба за правда и вистина.

— реклама —

„Нашата денешна борба ја водиме со демократски средства, со вистината, со јавниот збор, во Собранието и со гласот на граѓаните“, рече Филипче.

Во обраќањето, тој потсети на историското значење на 11 Октомври и на жртвата на партизаните во борбата за слобода и создавање на македонската држава.

Филипче порача дека обврска на денешните генерации е да ја зачуваат државата, да ја зајакнат економски и да создадат услови младите да останат да живеат во Македонија.

„Пред 85 години нашите предци се бореа да имаме своја држава. Нашата генерација мора да се избори децата да останат да живеат тука дома. И тоа е нашата историска задача“, истакна претседателот на СДСМ.