СДСМ обвини дека со ребалансот на Буџетот Владата ги намалува средствата наменети за младите и демографските политики, наместо да инвестира во нивната иднина.
Од партијата велат дека средствата за демографски политики се намалени за повеќе од 70 проценти, од 71 на 21 милион денари, а за Програмата за млади се кратат уште еден милион денари.
„Владата на ВМРО не инвестира во младите, туку крати од младите. Наместо повеќе средства за младите и демографските политики, тие ги намалуваат средствата, додека има пари за нови задолжувања и криминални партиски тендери“, соопштија од СДСМ.
Од опозициската партија тврдат дека за две години државата е задолжена за нови 2,5 милијарди евра и додаваат дека, според нив, нема зголемување на минималната плата, ниту повеќе средства за младите, образованието и студентите.
Во соопштението се наведува и дека младите ја напуштаат државата поради недостиг на перспектива и можности.
СДСМ информира дека поднела амандмани со кои бара повеќе средства за младите, демографските политики, ученичкиот и студентскиот оброк, како и за образованието.
