Србија се соочува со повеќе пожари предизвикани од екстремниот топлотен бран, а пожарникарите и припадниците на Секторот за вонредни ситуации вложуваат максимални напори за локализирање на огнените стихии.
Под контрола е ставен пожарот на регионалната депонија „Срем–Мачва“, благодарение на заедничката интервенција на пожарникарите и вработените во претпријатието. Во акцијата учествувале пет противпожарни возила, пет цистерни и шест камиони за нанесување земја, со која се покрива телото на депонијата и се намалува ширењето на чадот.
Големи пожари избувнаа и долж магистралниот пат Краљево – Нови Пазар, како и во Ибарската Клисура, меѓу Ушќе и Полумир. Поради густиот чад и непристапниот терен, пожарникарите со часови се бореле со огнот, а на дел од локациите пожарите се гаснат рачно, со ранци за вода.
Градоначалникот на Краљево, Предраг Терзиќ, изјави дека пожарите избувнале на четири различни локации.
Најкритична е состојбата во Делиблатската Песчара, каде што нов пожар, потпомогнат од високите температури и силниот ветер, зафатил повеќе од 300 хектари.
Помошникот на српскиот министер за внатрешни работи и началник на Секторот за вонредни ситуации, Лука Чаушиќ, изјави дека во гаснењето учествуваат повеќе од 80 припадници на Секторот за вонредни ситуации, доброволни противпожарни друштва и „Војводинашуми“.
Од воздух се ангажирани три хеликоптери на Министерството за внатрешни работи – Kamov Ka-32, H215 Super Puma и H145, а се очекува и пристигнување на тешка механизација за изработка на противпожарни појаси.
Министерот за внатрешни работи Ивица Дачиќ изјави дека на терен се испратени сите расположливи човечки и технички капацитети за локализирање на пожарите и спречување на нивното понатамошно ширење.
Нов пожар избувна и во селото Ракова кај Чачак, каде што огнот зафатил околу три хектари ливади и ниска вегетација. Во интервенцијата биле спасени две куќи и неколку помошни објекти, додека една жена побарала лекарска помош поради вдишување чад. Благодарение на брзата реакција на службите, пожарот бил изгаснат во вечерните часови.
