Во пресрет на празникот Рождество на Пресвета Богородица, познат како Мала Богородица, вечерва во храмот „Рождество на Пресвета Богородица“ во центарот на Скопје се одржа празнична вечерна богослужба.
Стотици православни верници присуствуваа на богослужбата, а потоа со иконата на Пресвета Богородица – Троеручица поминаа низ центарот на градот, во молитвена поворка посветена на празникот.
Рождеството на Пресвета Богородица се одбележува на 21 септември и е еден од 12-те големи празници во православната традиција. Празникот е посветен на раѓањето на Богородица, мајката на Исус Христос, и има особено значење во православното христијанство.
Според црковното предание, раѓањето на Пресвета Богородица го означува почетокот на настаните што водат кон Христовото раѓање и спасението на човештвото. Токму затоа празникот се доживува како ден на радост, надеж и вера.
Во народот празникот е познат како Мала Богородица, за разлика од празникот Успение на Пресвета Богородица, кој се одбележува на 28 август и е познат како Голема Богородица.
