(Видео) Судир на два авиона на аеродромот во Ханој – „Боинг“ му го распарал крилото на „Ербас“

На меѓународниот аеродром Нои Бај во главниот град на Виетнам, Ханој, во петокот попладне се случи необичен авиоинцидент, кога патнички авион од типот „Боинг 787“ удрил со крилото во задниот дел на авион „Ербас A321“, обајцата во сопственост на компанијата Vietnam Airlines.

— реклама —

Според извештаите, „Боингот“ се движел кон пистата за полетување кога со десниот крај на крилото го закачил репот на „Ербасот“, кој стоел неподвижно, чекајќи дозвола за полетување. Ударот бил доволно силен за да предизвика сериозно оштетување – дел од репот на „Ербасот“ буквално бил распарен.

Иако на двата авиони имало вкупно 380 патници, за среќа, никој не е повреден. Патниците биле пренасочени на други летови, додека двата оштетени авиона се приземјени и испратени на технички преглед.

— реклама —

Авиокомпанијата Vietnam Airlines соопшти дека четворица пилоти се суспендирани и дека е отворена внатрешна истрага. Според првичните наоди, можно е „Ербасот“ да не бил правилно паркиран, што придонело за несреќата.

— реклама —

Истрагата ќе ја води независна комисија во соработка со Виетнамската управа за цивилно воздухопловство (CAAV). Инцидентот е класифициран како сериозен безбедносен пропуст.