Организирана криминална група од Скопје, инволвирана во кривични дела поврзани со тероризам и недозволена трговија со оружје, е сузбиена во координирана полициска акција спроведена на 28 септември, соопшти Министерството за внатрешни работи.
Акцијата ја спровеле Одделот за сузбивање на организиран и сериозен криминал, во соработка со Агенцијата за национална безбедност, Одделот за специјални полициски операции и СВР Скопје, под раководство на надлежен јавен обвинител од Основното јавно обвинителство за гонење на организиран криминал и корупција.
По наредби за претрес издадени од судија на претходна постапка, биле извршени претреси кај шест лица на вкупно 12 локации на подрачјето на Град Скопје. При акцијата биле лишени од слобода пет лица.
При претресите биле пронајдени и одземени автоматски пушки, рамки за автоматски пушки, снајперска пушка и рамка за снајперска пушка, пиштоли, муниција од различен калибар, тактички елек, радио-врски, како и официјално знаме на терористичката организација ИСИС.
Полицијата одзела и поголема количина електронски уреди и мобилни телефони, како и поголема сума денарски и девизни парични средства.
Во текот на претресите било утврдено и неовластено користење електрична енергија, за што се преземаат дополнителни мерки согласно со законските надлежности.
Според МВР, К.И. (34) во 2023 година започнал со делување во рамките на злосторничка организација – огранок заснован на идеолошка матрица на ИСИС, со цел извршување кривични дела на територијата на Македонија.
Од МВР наведуваат дека К.И., како припадник на ИСИС, вршел индоктринација на млади лица за исполнување на целите на организацијата, ширел пропаганден материјал со екстремна и радикална содржина, како и набавувал и ракувал со огнено оружје.
Б.А. (24) и Е.С. (30), според полицијата, заедно со К.И. формирале група во која неовластено поседувале, посредувале и тргувале со огнено оружје и муниција.
Секторот за борба против тероризам, насилен екстремизам и радикализам на 29 септември до ОЈО за ГОКК поднел кривична пријава против тројцата.
К.И. е пријавен за кривичните дела „тероризам“ и „неовластено изработување, држење, посредување и тргување со оружје или експлозивни материи“, додека Б.А. и Е.С. се пријавени за кривично дело „неовластено изработување, држење, посредување и тргување со оружје или експлозивни материи“.
