Осудениот за настаните од 27 април, Јане Ченто, поднесе кривична пријава против поранешната јавна обвинителка Вилма Русковска, обвинувајќи за попречување на правдата и злоупотреба на службената положба, при што во фокусот ги стави сведочењето во постапката и, како што тврди, притисоци врз судија поротник.
Ченто информираше дека до Јавното обвинителство доставил докази кои, според него, сериозно го доведуваат во прашање текот на истрагата и судскиот процес за 27 април.
„Доказите укажуваат на комуникација меѓу висок функционер и еден од клучните сведоци, меѓу брат на еден висок функционер и сведок, на можни договори со обвинителот како и на насочување за сведочењето кое го даде сведокот во постапката“, изјави Јане Ченто.
Тој тврди дека сведокот со нотарски заверена изјава признал дека неговиот претходен исказ бил невистинит и дека бил даден под одредени ветувања.
„Сведокот со изјава заверена кај нотар изјавува дека неговиот претходен исказ даден во постапката бил невистинит и дека на истиот му било ветено дека ќе му се помогне во други кривични постапки доколку даде таков исказ“, изјави Јане Ченто.
Ченто посочува и дека постои вештачење од овластен судски вештак од телефони кое, според него, ја поткрепува оваа изјава, а дополнително алармира и за, како што наведува, притисок врз судија поротник.
„Кога имате заверени искази на нотар во кое се признава дека лажно се сведочело и кога имате јавно признание за притисок врз судија поротник тогаш ова повеќе не е политичка тема. Ова е прашање на владеење на правото“, изјави Јане Ченто.
Во обраќањето, Ченто нагласи дека не тврди вина, но дека постојат сериозни сомнежи за незаконити докази, притисоци врз сведоци и, како што рече, „монтирана постапка“.
„Ова не е политичка изјава, туку чекор заснован на документи и сериозни сомнежи за сторени кривични дела. Јас не сум суд и не тврдам вина, но имам обврска како граѓанин да пријавам кога постојат основани сомнежи“, изјави Јане Ченто.
Тој побара од институциите да постапат без одлагање и најави дека, доколку нема реакција, доказите ќе бидат објавени во јавноста.
Од Јавното обвинителство кратко соопштија дека пријавата ќе биде примена и дека ќе се проверат сите наводи.
„Како и секоја пријава, ќе биде примена и ќе се проверат наводите“, соопштија од Јавното обвинителство.
