Поранешната јавна обвинителка Вилма Русковска, по кривичната пријава што ја поднесе осудениот за настаните од 27 април, Јане Ченто, кој ја обвинува за попречување на правдата и злоупотреба на службената положба, вели дека нема од што да се плаши.
Русковска, прашана од „Скопје1“ дали се „пазарела“ со сведок, кој сега преку изјава заверена на нотар признава дека лажно сведочел вели:
„Неколку обвинети добија помали казни затоа што сведочеа за настанот во текот на главната расправа и тоа според ЗКП е дозволено. Не знам кој е тој сведок.
Во однос на тврдењата дека постоела комуникација меѓу сведок и функционери, како што кажа Ченто, таа не одговори ништо конкретно. Но посочи дека постоел обвинет во случајот, за кого Катица Јанева барала да не биде опфатен со обвинението
„Знам за обвинет кој беше обвинет и од страна на СЈО. Катица бараше да не го гонам, не се согласив“, изјави Вилма Русковска.
Таа додава дека не чувствува никаков страв поради поднесената пријава.
„Нема зошто да се плашам. Што може да каже тој ‘сведок’? Немало насилство во Собрание?“, изјави Вилма Русковска за „Скопје1“.
Русковска се осврна и на изјавите на премиерот Христијан Мицкоски, кој побара расчистување на случајот и изрази сомнеж за пресудите.
„Премиерот нека се грижи за извештајот на Еропската Комисија, затоа што и вакви изјави многу придонесуваат за тоа што го пишува таму“, изјави Вилма Русковска.
Претходно, Јане Ченто соопшти дека до Обвинителството доставил докази кои, според него, укажуваат на комуникации и договори со сведоци, како и на притисоци во текот на постапката за 27 април.
„Сведокот со изјава заверена кај нотар изјавува дека неговиот претходен исказ даден во постапката бил невистинит и дека на истиот му било ветено дека ќе му се помогне во други кривични постапки доколку даде таков исказ“, изјави Јане Ченто.
Тој посочи и дека постои вештачење од телефони кое, според него, ги поткрепува овие наводи, како и сомнежи за притисок врз судија поротник.
Од Јавното обвинителство информираа дека пријавата ќе биде разгледана.
„Како и секоја пријава, ќе биде примена и ќе се проверат наводите“, соопштија од Јавното обвинителство.
