Пратеничката Илире Даути од Алијанса за Албанците, крилото на Зијадин Села, одби да се тргне од собраниската говорница, барајќи одговор од премиерот Христијан Мицкоски на прашање поврзано со Законот за правична застапеност, кое, како што рече, го поставила на претходната седница.
Даути посочи дека сѐ уште не добила писмен одговор, иако, според неа, законскиот рок од 20 дена веќе истекол.
„До овој момент, јас не сум добила писмен одговор од премиерот на прашањето. Одговорот требаше да биде даден во рок од 20 дена“, рече Даути.
Таа потсети дека на претходната седница било кажано дека премиерот треба усно да одговори на прашањето и порача дека нема да ја напушти говорницата сѐ додека тоа не се случи.
„Бев многу јасна претходниот пат и кажав дека премиерот треба да даде усмен одговор, на прашањето поставено усно претходниот пат. Нема да мрднам од тука додека не ми се даде одговор од премиерот, на прашањето од минатиот пат. Тоа не го направи кога излезе на говорница. Тој може да ги бира губитниците да бидат во Владата, но не може да бира на кое прашање ќе даде одговор, а на кое не“, рече Даути.
Пратеничката додаде дека, доколку не добие одговор од Мицкоски, нема да дозволи седницата да продолжи.
Во обид да ја надмине ситуацијата, претседателот на Собранието, Африм Гаши, предложи расправата да продолжи.
„Можете и од место да се обратите додека пратеничката да се смири“, рече Гаши.
Потоа му даде збор на пратеникот Ријад Шаќири, кој побара да се обрати од говорницата, а не од своето место. Поради тоа што говорницата беше блокирана, Африм Гаши даде пауза од 30 минути
