(Видео) Торнадо со ветрови до 137 километри на час погоди дел од Чиле

Торнадо, обилни врнежи и силни ветрови предизвикаа големи материјални штети во Чиле, поради што властите издадоа регионално црвено предупредување за метрополитенскиот регион Сантјаго и ја прекинаа наставата во повеќе од сто училишта. Во погодените подрачја се регистрирани поплави, свлечишта и прекини во снабдувањето со електрична енергија, јавува агенцијата „Анадолу“.

Чилеанската дирекција за метеорологија предупреди на можност од грмежи, град и силни локални налети на ветер во крајбрежниот планински појас, долината, подножјето на планините и планинскиот венец.

— реклама —

Од институцијата потврдија дека торнадо од категоријата ЕФ0, со ветрови со брзина од 105 до 137 километри на час, ги оштетило покривите на автобуската станица „Аламеда“ во општината Естасион Сентрал.

Националната служба за спречување и одговор при катастрофи наредила мобилизација на итните служби и ресурси за справување со последиците од невремето.

— реклама —

Регионалната дирекција на службата потврдила оштетувања на 15 домови. Во четири станбени комплекси во Њуњоа биле поплавени подрумите, што предизвикало нарушувања во снабдувањето на жителите со вода за пиење. Во Реколета, по свлечиште во паркот во Сантјаго, кал навлегла во два дома.

Последиците од невремето се почувствувале и во образовниот систем. Министерството за образование соопштило дека наставата била прекината во 115 образовни установи, додека оштетувања на училишни објекти биле регистрирани на 124 места во 20 општини.

Локалната служба за јавно образование во Сантјаго Сентро, како и општинските власти во Провиденсија, Њуњоа и Лас Кондес, потврдиле дека голем број училишта биле затворени поради обилните врнежи и градот.

— реклама —

Невремето предизвикало и прекини во снабдувањето со електрична енергија. Надзорното тело за електрична енергија и горива соопштило дека до 23 часот во вторникот, по локално време, околу 36.000 корисници низ земјата останале без струја. Од нив, приближно 23.000 биле во метрополитенскиот регион.

Во општината Арауко, во јужниот регион Биобио, пукнатини во земјата наложиле превентивно преместување на 13 семејства од населбата Вила ел Мирадор. Поместувањето на теренот претставува закана за повеќе од 300 домови.

И покрај значителната материјална штета, итните служби потврдиле дека во погодените подрачја засега нема пријавени повредени или загинати лица.