(Видео) Најмалку 10 загинати во силното невреме во Чиле, илјадници погодени од поплавите

Бројот на загинати во силното невреме што ги погоди северните, централните и јужните делови на Чиле се искачи на 10, додека повеќе од 2.400 лица се директно погодени од последиците, а над 104.000 останаа отсечени поради поплави и свлечишта.

Според најновите информации, повредени се 17 лица, а 1.168 жители се сместени во привремени прифатни центри, главно во регионите Атакама, Кокимбо и во Метрополитенската област околу Сантијаго.

— реклама —

Властите соопштија дека четири лица сè уште се водат како исчезнати – две во регионот Кокимбо и две во Атакама.

— реклама —

Невремето целосно уништило 76 куќи, тешко оштетило 2.121 објект, додека речиси 17.000 домови претрпеле помали оштетувања. Дополнително, состојбата на уште 888 објекти сè уште се проценува.

Поради опасност од излевање на реките и нови свлечишта, продолжуваат превентивните евакуации на населението. Од почетокот на кризата испратени се 124 предупредувања преку националниот систем за итно известување.

— реклама —

Поради продолжените обилни врнежи, владата ја прекина наставата во повеќе региони, меѓу кои целиот регион Кокимбо и делови од Атакама, Валпараисо и Метрополитенската област.

Чилеанската метеоролошка служба ги задржа предупредувањата за силни врнежи и грмежи, додека околу 138.000 корисници останаа без електрична енергија.

Спасувачките екипи и понатаму интервенираат во најпогодените подрачја, вклучително и со воздушни медицински евакуации, додека телекомуникациските компании поставуваат мобилни базни станици за да се воспостави комуникација во отсечените области.