(Видео) Трамп го претстави новиот претседателски авион вреден 400 милиони долари

Американскиот претседател Доналд Трамп го претстави новиот претседателски авион, модифициран „Боинг 747-8“, кој минатата година беше дониран на Соединетите Американски Држави од Катар.

Говорејќи во воената база „Ендрус“, Трамп изјави дека авионот е претворен во „летечка Бела куќа“ со ниво на удобност и опременост какво досега не било видено.

— реклама —

Американските воздухопловни сили соопштија дека се завршени сите неопходни преуредувања, а авионот сега ќе влезе во фаза на пробни летови пред официјално да биде ставен во служба за превоз на претседателот на САД.

— реклама —

Според надлежните, извршени се значителни подобрувања на безбедносните системи, комуникациската опрема, логистичката поддршка и напредните технолошки решенија. Дополнително, отстранети биле сите можни безбедносни ризици поврзани со фактот што леталото претходно било во сопственост на друга држава.

Луксузниот авион, чија вредност се проценува на околу 400 милиони долари, беше дониран од катарското кралско семејство во мај 2025 година. Донацијата предизвика бројни реакции и критики и кај демократите и кај републиканците, кои сметаа дека станува збор за можен судир на интереси.

— реклама —

Белата куќа, сепак, инсистира дека прифаќањето на авионот е целосно законско и најави дека по завршувањето на мандатот на Трамп леталото ќе биде предадено на неговата претседателска библиотека.

Во моментов државната претседателска флота ја сочинуваат два авиона од типот „Боинг 747-200Б“, кои се користат уште од 1990 година. Новиот „Боинг 747-8“ ќе служи како привремено претседателско летало сè додека не бидат испорачани двата нови авиона од идната генерација, чија испорака повеќепати беше одложувана поради проблеми во производството.