Американскиот претседател Доналд Трамп изјави дека никој во историјата не заслужува Нобелова награда за мир повеќе од него, тврдејќи дека успеал да запре повеќе големи војни ширум светот.
„Без разлика дали им се допаѓа на луѓето или не, јас решив осум војни. Големи. Некои траеја 36, 32, 31, 28, 25 години. Некои допрва требаше да започнат, како Индија и Пакистан. Веќе беа соборени осум авиони. И јас тоа го решив многу брзо, без нуклеарно оружје“, рече Трамп.
Тој додаде дека не може да се сети на историска личност која повеќе заслужува Нобелова награда за мир.
„Не сакам да се фалам, но никој друг не запирал војни како мене“, изјави американскиот претседател.
Во своето обраќање, Трамп го критикуваше и поранешниот претседател Барак Обама, кој ја доби Нобеловата награда за мир во 2009 година.
„Обама доби Нобелова награда. Немаше поим зошто. И денес нема поим. Ја доби веднаш откако стапи на функција. Не направи ништо и беше лош претседател“, рече Трамп.
Тој оцени дека наградата би требало да се доделува за секоја запрена војна.
„Во теорија, треба да добиете Нобелова награда за секоја војна што сте ја запреле. Секоја беше голема, никој не веруваше дека може да се запре“, додаде Трамп, наведувајќи дека и рускиот претседател му признал дека не успеал да реши одредени конфликти.
И покрај ваквите тврдења, Трамп нагласи дека наградата не му е приоритет.
„Не ме интересира тоа. Ме интересира спасувањето животи. Спасив десетици милиони луѓе“, изјави тој.
Изјавата доаѓа во време на ескалација на конфликтот меѓу САД, Израел и Иран, кој во изминатиот месец прерасна во поширок регионален судир без јасно дипломатско решение на повидок.
