(Видео) Трамп: Обама и Бајден му помогнаа на Иран, Бајден немаше што да каже бидејќи е глуп

Американскиот претседател Доналд Трамп ги обвини своите претходници Барак Обама и Џо Бајден дека со својата политика му помогнале на Иран да стане посилна држава.

Во интервју за конзервативната телевизија „Фокс њуз“, Трамп изјави дека Обама застанал на страната на Иран, а Бајден, според него, не се спротивставил.

— реклама —

„Обама застана на страната на Иран и поради тоа тие станаа помоќни. Станаа многу помоќни поради Обама и Бајден, но Бајден веројатно немаше што да каже бидејќи беше глуп“, рече Трамп.

Тој притоа се осврна на нуклеарниот договор од 2015 година, официјално наречен Заеднички сеопфатен акциски план (JCPOA), со кој Иран прифати ограничувања на својата нуклеарна програма, а за возврат доби олеснување на меѓународните санкции и одмрзнување на дел од својот имот. Договорот беше склучен меѓу Иран и групата П5+1, во која членуваа САД, Велика Британија, Франција, Кина, Русија и Германија.

— реклама —

Трамп потсети дека во мај 2018 година, за време на неговиот прв претседателски мандат, САД официјално се повлекоа од договорот.

— реклама —

Американскиот претседател повторно изјави дека Иран ја губи конфронтацијата и додаде дека САД ќе го контролираат Ормускиот теснец.

„Ќе го задржиме теснецот и веројатно ќе управуваме со него. Ќе станеме чувари на теснецот. За тоа треба да бидеме обештетени. Кога ќе го направиме тоа, ќе бидеме платени“, рече Трамп.

Тој повторно зборуваше и за ликвидацијата на поранешниот командант на силите „Кудс“ при Иранската револуционерна гарда, Касем Солејмани, кој беше убиен во американски напад во 2020 година.

„Го убив Хомеини, кој беше брилијантен, но луд генерал. Солејмани – го убив Солејмани“, изјави Трамп, притоа погрешно поврзувајќи го Солејмани со поранешниот врховен лидер на Иран, Рухолах Хомеини, кој почина во 1989 година.