(Видео) Трамп објави видео направено со вештачка интелигенција: Во улога на лекар им препишува „терапија“ на своите противници

Американскиот претседател Доналд Трамп објави видео генерирано со вештачка интелигенција во кое се претставува како лекар што ги „лекува“ своите најпознати критичари од измислено нарушување наречено „Трампов синдром“ (Trump Derangement Syndrome – TDS).

— реклама —

Видеото беше објавено на неговата социјална мрежа Truth Social и прикажува AI-верзии на неколку јавни личности кои во изминатите години отворено ја критикуваа неговата политика и администрација. Меѓу нив се актерите Роберт Де Ниро, Едвард Нортон и Џулија Робертс, како и водителките и актерки Рози О’Донел и Вупи Голдберг.

Во една од сцените, AI-верзијата на Роберт Де Ниро вели дека поради противењето на Трамп „не можел да јаде, не можел да спие и ги правел несреќни сите околу себе“.

— реклама —

Трамп во видеото носи бел лекарски мантил и стетоскоп, а тврди дека не бил сигурен дали ќе може да им помогне на лицата кои страдаат од TDS – израз што тој и неговите поддржувачи често го користат за, како што велат, „неразумната омраза“ кон неговите политики.

— реклама —

Во сатиричниот „план за лекување“, AI-верзијата на Трамп препорачува „исклучување на лажните вести“, молитва и пиење диетална кока-кола како начин за ублажување на наводните симптоми.

На видеото реагираше актерката и водителка Рози О’Донел, која порача дека нејзиниот став кон Трамп останува непроменет. Таа го нарече американскиот претседател „сериозно болен“ и повторно повика на примена на 25. амандман од американскиот Устав, кој предвидува постапка за утврдување на неспособност на претседателот да ја извршува функцијата.

— реклама —

Од Белата куќа соопштија дека станува збор за дел од препознатливиот политички и комуникациски стил на претседателот. Портпаролот Дејвис Ингл изјави дека Трамп има право да објавува ваква содржина на своите профили на социјалните мрежи.