(Видео) Трамп повторно се закани со напад врз тајниот ирански нуклеарен комплекс „Пикекс“

Американскиот претседател Доналд Трамп повторно се закани со можен напад врз иранскиот подземен нуклеарен комплекс „Пикекс“, тврдејќи дека САД би можеле наскоро да ја нападнат локацијата за која Израел смета дека се користи за складирање на дел од резервите збогатен ураниум и напредни центрифуги.

„Многу е веројатно дека наскоро ќе го нападнеме тоа подрачје. Тие не можат да направат речиси ништо за да го спречат тоа“, изјави Трамп.

— реклама —

Техеран возврати дека секој американски напад врз иранските нуклеарни постројки ќе се смета за проширување на војната во регионот.

„Пикекс“ е строго обезбедуван подземен комплекс во централниот дел на Иран, сместен околу еден и пол километар јужно од постројката за збогатување ураниум во Натанц. Објектот е изграден на повеќе од 100 метри под планината Кух-е Коланг Газ Ла, што го прави исклучително тешка цел за воздушни или копнени напади.

— реклама —

Изградбата започнала во 2020 година, а Иран локацијата ја пријавил до Меѓународната агенција за атомска енергија како иден погон за склопување центрифуги. Поради недостиг на официјални информации, проценките за објектот главно се темелат на анализа на сателитски снимки, според кои комплексот располага со повеќе тунели, засилени бетонски влезови и широк безбедносен појас.

Според израелски разузнавачки извори, по нападите врз иранските нуклеарни постројки минатата година, дел од резервите на збогатен ураниум и напредните центрифуги биле префрлени токму во „Пикекс“. За време на тие напади Израел ги гаѓаше Натанц, Исфахан и Фордо, а подоцна во операцијата се вклучија и САД.

— реклама —

Иако Трамп тогаш тврдеше дека иранските нуклеарни капацитети се уништени, подоцнежните американски и меѓународни проценки покажаа дека дел од програмата останал зачуван.

Трамп изјави дека нема официјална потврда оти напредните центрифуги навистина се префрлени во „Пикекс“, додека Иран ги отфрла ваквите тврдења и повторува дека неговата нуклеарна програма има исклучиво мирољубива намена.

Експертите се поделени околу евентуален напад. Дел сметаат дека уништувањето на комплексот би го спречило Иран повторно да го развие капацитетот за збогатување ураниум, додека други предупредуваат дека поради длабочината на објектот воздушните напади би можеле да имаат ограничен ефект и најмногу да ги оштетат пристапните тунели, без трајно да го неутрализираат постројката.