(Видео) Тројца Македонци загинаа во тешка сообраќајка во Словенија, двајца се повредени

Тројца македонски државјани загинаа, а уште двајца се повредени во тешка сообраќајна несреќа на приморскиот автопат во Словенија, на делницата меѓу Унец и Равбаркоманда, во правец кон Копер.

Според првичните информации од словенечката полиција, во несреќата учествувале камион и патничко возило.

Камионот поради дефект бил запрен покрај автопатот, кога автомобилот во кој се наоѓале пет лица удрил во задниот лев дел од приколката.

— реклама —

Сите петмина во автомобилот биле државјани на Македонија.

View this post on Instagram

Лекар на местото на несреќата констатирал смрт кај тројца од нив.

— реклама —

Еден од повредените со медицински хеликоптер бил пренесен во болница, додека повредениот возач на автомобилот бил транспортиран со возило на Итната медицинска помош.

Несреќата била пријавена во 16:28 часот, по што на местото биле испратени повеќе полициски патроли и пожарникари.

— реклама —

Увидот продолжува, а на местото биле упатени и државен обвинител и истражен судија.

Полицијата најави дека повеќе детали за причините и околностите под кои се случила несреќата ќе соопшти по завршувањето на првичните истражни дејствија.

Поради несреќата автопатот во правец кон Копер бил затворен, при што се создале долги колони возила.

Товарниот сообраќај бил пренасочуван кај Логатец, а полицијата ги извлекувала возилата што останале заглавени во колоните.

Надлежните ги предупредиле возачите да не ги напуштаат автомобилите додека се во застој, поради опасноста на автопатот.

За кратко била затворена и спротивната насока кон Љубљана поради слетувањето на медицинскиот хеликоптер, но сообраќајот таму подоцна бил повторно воспоставен.